DiliPost.com-Liu husi deklarasaun Ministeriál Konferénsia Fasilitasaun ICAO 2025 (FALC 2025) Indonesia – Forum importante Fasilita transporte aéreo aliña tebes ho Timor Leste nia vizaun nu’udar nasaun integra kle’an liután iha ekosistema aviasaun global.
Ministru Transporte no Komunikasaun, Miguel Marques Gonçalves Manetelu hateten, ne’e hanesan onra no priviléjiu atu koalia ba distintu asembleia iha Konferénsia Fasilitasaun ICAO 2025.
“Lori Governu Repúblika Demokrátika Timor-Leste(RDTL) hakarak hato’o ami nia apresiasaun sinseru ba Estadu Qatar ba ninia konvite, no ba ospitalidade jeneroza ne’ebé hato’o mai ha’u no ha’u nia delegasaun durante ami nia estadia iha Doha,”tenik Ministru Miguel Manetelu iha Konferénsia Fasilitasaun ICAO 2025 (FALC 2025) foin lalais ne’e
Aliende ne’e, Permite atu elojia Estadu Qatar no Organizasaun Internasionál Aviasaun Sivíl (ICAO) ba organizasaun fórum importante ida-ne’e ho furak tebes. Tema, “Fasilita Futuru Transporte Aéreu, Kolaborasaun, Efisiénsia, Inkluzividade,” aliña tebes ho TL nia vizaun nu’udar nasaun joven ne’ebé haka’as-an atu integra kle’an liután iha ekosistema aviasaun globál.
Okaziaun aprezenta tempu ida ne’ebé oportunu atu reitera agradesimentu ba ICAO ba ninia apoiu metin no kooperasaun téknika dezde TL nia adezaun ba Organizasaun ne’e iha tinan 2005.
Inisiativa kapasitasaun no asisténsia téknika ne’ebé simu sai esensial hodi avansa dezenvolvimentu ba setór aviasaun sivíl. Ligado ho ida-ne’e, ami hein ba Programa Auditoria Seguransa Universál Abordajen Monitorizasaun Kontínua (USAP-CMA), ne’ebé tuir planu sei hala’o iha Dili hahú hosi 26 Maiu to’o 4 Juñu 2025 marka importante ida iha reforsu seguransa no kumprimentu aviasaun nian iha rain.
Governante ne’e mós aproveita oportunidade ida ne’e atu espresa apresiasaun ba parseirus, inklui Ajénsia Seguransa Aviasaun Uniaun Europeia nian (EASA) no parte interesada internasionál sira seluk, ba sira nia kompromisu no kolaborasaun ne’ebé la’o hela.
“ Ita bo’ot sira nia apoiu hala’o ona papél signifikativu ida hodi reforsa ami nia enkuadramentu regulatóriu no ami hein atu kontinua aprofunda parseria sira-ne’e iha espíritu benefísiu mútuo no sustentabilidade nian,” subliña Ministru Miguel Manetelu.
Nia hatutan Prezensa iha FALC 2025 reafirma TL nia dedikasaun atu kumpre ninia obrigasoins tuir enkuadramentus ICAO nian, liuliu iha área fasilitasaun nian tuir Aneksu 9.
Serbisu maka’as atu aliña sistema no prosesu nasionál sira ho norma internasionáis hodi garante prestasaun viajen aéreu ne’ebé seguru, efisiente, no laiha problema ba pasajeiru hotu-hotu.
Nu’udar nasaun ho ekonomia ki’ik no sistema aviasaun sivíl ne’ebé sei joven los, ami fiar metin iha valór kooperasaun internasionál no responsabilidade hamutuk.
“ Ami husu ba komunidade aviasaun internasionál atu kaer metin prinsípiu inkluzividade nian, hodi garante katak laiha nasaun ida la haree ba nia medida ka estatutu ekonómiku maka husik hela iha kotuk,” dehan Governante ne’e.
Nia mos relata kona ba asesu ba fasilitasaun transporte aéreu no kapasitasaun maka importante tebes atu haburas konetividade globál no atinji Objetivu sira Dezenvolvimentu Sustentável Nasoins Unidas nian.
Mai kontinua servisu hamutuk atu kria sistema transporte aéreu ida ne’ebé inkluzivu, efisiente, no reziliente, ida ne’ebé serve nesesidade ema hotu nian, iha fatin nebe de’it.
Partisipante sira ne’ebe partisipa iha Konferénsia Fasilitasaun ICAO 2025 (FALC 2025), Mohammed bin Abdullah Al-Thani, Ministru Transporte Estadu Qatar; Mohamed Faleh Al-Hajri, Prezidente Interinu Autoridade Aviasaun Sivíl Qatar; Salvatore Sciacchitano, Prezidente Konsellu Organizasaun Internasionál Aviasaun Sivíl (ICAO); Juan Carlos Salazar, Sekretáriu Jerál ICAO; Excelénsias Ministrus/as, Distintus Delegadus, Señoras no Señores.(aza)
