Dílipost.com,Loron 20 Juñu 2026 – Primeiru-Ministru Timor-Leste, Kay Rala Xanana Gusmão, hato’o agradesimentu bá povu Timor-Leste no ema hotu ne’ebé fó parabéns no mensajen boa vontade bá nia iha okaziaun aniversáriu bá dala-80 (20 Juñu 1946-20 Juñu 2026).
Iha nia mensajen, Primeiru-Ministru agradese bá domin, respeitu no apoiu ne’ebé povu Timor-Leste hatudu durante tinan barak nia laran.
Sentidu solidariedade no afetu hosi povu sai fonte forsa ida atu Xanana Gusmão kontinua serví país.
“Ha’u agradese tebes bá maun-alin Timoroan no belun sira hotu ne’ebé hato’o parabéns no demonstrasaun domin ba ha’u. Sentimentu ne’e fó kbiit bá ha’u atu kontinua servisu bá rai no povu,” Primeiru-Ministru agradese iha Aeroportu Internasionál Instánbul, Turki.
Idade bele aumenta kada tinan, maibé Xanana Gusmão dehan kompromisu atu dezenvolve nasaun no halo di’ak bá povu Timor-Leste tenke forte nafatin.
“Tinan bele aumenta, maibé ida ne’ebé importante liu mak ita-nia kompromisu atu servisu bá povu no dezenvolve rai ida ne’e,” Xanana hato’o lia menon.
Kompromissu ne’ebé prioridade liu maka hadi’a ekonomia nasionál, kria oportunidade bá povu no asegura dezenvolvimentu sustentável bá jerasaun sira agora no iha futuru.
Esforsu atu dezenvolve Timor-Leste ho baze hosi sakrifísiu mártir no herói sira ne’ebé luta no fó sira nia moris bá independénsia no ukun-an nasaun nian.
“Kompromisu atu hadi’a ekonomia no moris povu nian tenke la’o tuir valór no prinsípiu ne’ebé mártir no erói sira hosi luta bá independénsia husik mai ita. Sira fó nia moris atu Timor-Leste bele ukun-an, no ita iha dever atu kontinua servisu hodi halo nasaun ida ne’e di’ak liu tan,”dehan Primeiru-Ministru.
Primeiru-Ministru remata ho apelu bá unidade nasionál no servisu hamutuk entre povu no instituisaun sira hodi realiza mehi atu harii Timor-Leste ida ne’ebé prósperu, justu no dezenvolvidu.
Jornalista : Dílipost.com
