DiliPost.com-Prezidente Repúblika (PR), Jose Ramos-Horta husu ba Nasaun riku sira no Instituisaun Finanseiru Internasionál (IFI), sira atu ajuda selu deve no aumenta asisténsia ba Nasaun Vulneravel sira ne’ebé dezenvolve hela.
Ko’alia konaba problema Ekonómia ne’ebé Estadu dezenvolvimentu sira hasoru, krize dívida Globál ho totál dívida liu 30%, husi PIB iha Mundu tomak. Dehan PR Horta husi nota Inprensa,Tersa-feira (27/02).
Informasaun ne’e, liu husi diskursu iha sorumutu Ministerial da-3 husi grupu Estadu frazil G7+, hala’o iha Abu Dhabi iha loron (26/02/2024). G7+ kompostu husi Nasaun 20 ho natureza Instituisaun fraku. Governasaun fraku no frazilidade, tanba konflitu. Membru sira inklui Afganistaun, Guine-Bissau, Haiti no Timor-Leste (TL).
Invazaun
Prezidente mós nota oinsá krize Globál sira hanesan Covid-19 no Invazaun Rusia nian ba Ukrainia kria instabilidade ba Nasaun ki’ak sira. Horta argumenta katak, Kreditór no Banku sira la dú’un iha vontade atu halo restrusaun ou fó perdua ba tusan ne’ebé Nasaun frajil sira deve.
PR ezije organizasaun no Nasaun doadór sira atu aumenta fundus ba Nasaun sira ne’ebé la du’un dezenvolvidu iha Mundu.
Fó avizu katak, lakohi tulun se’i hamosu ki’ak no kondisaun katak, labarik sira obriga halo servisu no sa’i atan.
PR Horta husu fundu Globál foun ida atu ajuda Nasaun G7+, sira atu hasoru xoke no dezastre Ekonomia.
Agora mak tempu ba Nasaun riku sira iha parte Súl, Banku sira, Kompañia bo’ot sira no Biliunáriu sira atu hamri’ik hodi apoiu mós.(any)
