DiliPost.com -Koordenadora Salon ‘Nekaf Mese’, Lorença Colo, konsege emprega ona servisu ba joven hamutuk na’in lima(5).
Salon “Nekaf Mese” nia siknifika Neon ida laran ida atu servisu hamutuk ho maluk sira hotu hodi hetan osan,grupu ne’e kompostu husi ema nain 5,feto nain 3 no mane nain 2.
Koordenadora Grupu Nekaf Mese Lorença Colo,Informa Grupu ne’e harí’i iha tinan 2024 ho nia objetivu atu ajuda joven sira neʼebé la kontinua sira nia estudu,tanba balu nesésidade familia la sufisiente hodi kontinua ba hala’o Estudu.
“Ha’u nu’udar feto ida ha’u hakarak loke Salon ida ne’e,atu ajuda ha’u nia maluk Feto no mane sira ne’ebé nia inan-aman laiha kbi’it atu ajuda sira hodi sira kontinua sira nia estudu”Dehan Koordenadora Salon Nekaf Mese, Lorença Colo, ba jornalista sira,iha Palaban Pante Makasar RAEOΑ, Kuarta-Feira (25/09) ne’e.
Nia dehan molok servisu,sei fó formasaun oinsá atu tesi mane nia fu’uk no Tesi Feto nia fu’uk no dada feto nia fu’uk hodi sira bele hetan osan maske la barak maibé belé bele uza ba sira nia nessesidade.
“Molok servisu,sei fó formasaun oinsá atu tesi mane nia fu’uk no Tesi Feto nia fu’uk no dada feto nia fu’uk hodi sira bele hetan osan maske la barak maibé bele uza ba sira nia nessesidade Lor-Loron”.
Nia haktuir, dala-barak públiku nia intensaun Loke Salon ne’e ladi’ak,maibé nia nafatin konsiente ho nia prinsípiu hodi ajuda maluk Oe-Cusse oan sira atu hetan osan maske osan ho montante ne’ebé sira hetan kiik, maibé bele uza ba sira nia nessesidade.
“Ami nia salon ne’e,tesi mane nia fu’uk kada ema ida ho montante $ 2 dolar, bainhira ami tesi feto nia fu’uk ema ida ho montante $ 5 dolar no ami nia kliente loron-loron sempre iha maibé la du’un barak”, tenik Lorença.
Nia Subliña sira hetan rendimentu ne’ebé ne’e bainhira loron boot, mak hafoin ema barak dala-ruma bele hetan $ 30 dolar ba leten.
“Loron ida sira hetan rendimentu totál
$ 10 dolar ba leten no bainhira loron boot mak sira foin hetan rendimentu di’ak,loron ida bele hetan $ 30 ba leten”dehan nia.
Nia hatutan, osan ne’ebé sira hetan, rai hamutuk hanesan kest to’o tinan ida,dalaruma hetan $ 400 dolar no osan ne’e,sira sei la fahe no sei utiliza ba nesesidade Salon nian ne’ebé durante sira uza.
“Osan ne’ebé ami hetan,ami rai hamutuk hanesan kest to’o tinan ida,dalaruma hetan $ 400 dolar no osan ne’e,ami sei la fahe no sei utiliza ba nesesidade Salon nian ne’ebé durante sira uza”.sublina Lorença.
Aleinde ne’e nia dehan ,osan hirak ne’ebé sira tau hamutuk ne’e ,Sira fó ba ema hodi empresta ho nia funan 10%.
Tanba iha fulan Agustu nia laran ema empresta ho nia funan hamutuk $ 4.200 dolar.
” Osan hirak ne’ebé ami tau hamutuk ne’e ,ami fó ba ema hodi empresta ho nia funan 10%.Tanba iha fulan Agustu nia
laran ema empresta ho nia funan hamutuk $ 4.200 dolar”.Nia hatutan.
Nia mos relata kona ba SEFOPE apoiu Osan totál $4.150 dollar ba Grupu Nekaf Mese hodi Sosa ekipamentus Salon nian.
“Ami nia salon ne’e hetan ona apoiu husi Governu liu-hosi SEFOPE ho osan montante $ 4.150 dolar hodi ami sosa ba ami nia Ekipamentus Salon nian.”dehan nia.
Entretantu durante sira loke salon ne’e sempre hetan dezafiu,tamba membru sira foin mak aprende tesi fuk dala-ruma seidauk hatene tesi fu’uk tuir modernu nian maibé sira nafatin esforsu atu la’o neneik to’o di’ak.
𝐉𝐨𝐫𝐧𝐚𝐥𝐢𝐬𝐭𝐚 𝐉𝐮𝐥𝐢𝐚 𝐋𝐮𝐫𝐝𝐞𝐬 𝐝o Rego
