DiliPost.com-Bankada Partidu Libertasaun Popular (PLP), kestiona ho manutensaun ba Ró Berlin Nakroma ne’ebe kuaze fulan-4 resin ona seida’uk fila mai Timor-Leste (TL).
Deputada Bankada PLP, Maria Angelina Lopes Sarmento katak, bazeia ba informasaun ne’ebe simu, hodi nota katak manutensaun ba Berlin Nakroma iha Indonesia han tiha tempu kuaze fulan- liu ona, ba iha Outobru maibe, to’o ohin loron seida’uk fila. Nia deklara ba Jornalista iha Parlamentu Nasional (PN), Tersa-feira (11/03/2025).
Momentu kuandu Ró ne’e, ba atraka iha fatin ne’ebe atu halo manutensaun ou bolu dehan ‘Doka’ hanesan ‘Bengkel’ kuandu Ró ne’e, atu atraka iha ne’eba entaun Ró ida mai soke tan tiha Ró ne’e, depois halo nia ‘Nakbetok tiha.’
Razaun
Entaun,”ita presiza halo investigasaun, kuandu sira uza razaun dehan forsa natureza tanba anin bo’ot. Normalmente kuandu Ró-1 atu atraka iha fatin-1 sempre hatene konaba kondisoins iha area sorin-sorin.
Se anin bo’ot entaun tenke informa atu sira hatene hodi ta’u ankor, karik ankor metin, sira uza razaun dehan ankor ta’u tu’un ba Tasi laran lametin anin hu’u ikus mai Ro-1 ne’ebe para besik iha ita nia Ro Berlin Nakroma soke tiha ita nia Ro,”tenik Maria.
Manutensaun
Tanba, kustu ba manutensaun hamutuk $ 785,000.00, kompara ho kustu manutensaun iha VIII Governu Konstituisional nian. Gasta de’it $ 200,000.00. Entaun, perguntas bo’ot tanba saida Ró-1 ne’ebe nia kondisaun hanesan ninia manutensaun uluk $ 200,000.00 agora $ 785,000.00.
Manutensaun Ró nian Bankada PLP simu mos informasaun katak, normalmente Ró sempre iha nia seguru ‘Safety’ ba pasajeiru sira. Entaun, iha Ró nia ninin ne’e, ta’u Bote Seguransa ou Seguransa Ro nian ba pasajeiru sira. Maibe, momentu sira ba halo manutensaun ninia Bote Seguransa monu tiha ba Tasi laran.
Derepente
Maria esplika, Bote Seguransa ne’e, kuandu sa’e Ro derepente Ró ahi-han ou anin bo’ot buat ruma akontese Bote Seguransa fo ba pasajeiru sira atu tama iha Tasi laran, karik Bote Seguransa ajuda ou asegura pasajeiru sira seguru.
Bote Seguransa ne’e, monu tu’un, depois manutensaun hotu sira fila mai,”ami rona dehan Bote Seguransa sorin monu tu’un ne’e, sira la tara fali mai de’it, no Ro ne’e, mai daudaun ona husi Indonesia mai Timor. Bote Segurasan husi liman karuk mak monu loos di’ak hela,”tenik nia.
Bote pasajeiru la iha se’i prejudika ba pasajeiru sira sa’e ba Atauro no Oecusse akontese buat ruma iha dalan Bote Seguransa la iha la bele salva ema nia vida. Normalmente tu’ir padraun ‘Safety’ iha Tasi katak, Bote Seguransa la iha Ró la bele halo operasaun.
Prienxe
Ró ne’e, kuandu ba halo manutensaun fila mai Bote Seguransa, la iha tu’ir loloos ‘Doka’ ‘Bengkel’ iha Indonesia la bele autoriza lai Ro ne’e, fila lai mai. Tanba, la prienxe padraun Seguransa iha Tasi laran.
Ne’e, importante tebes tanba Ro Nakroma, Ro-1 ne’ebe buka pasajeiru no osan no fo rendimentu ho reseitas. Ida ne’e, sustenta fali Ró ne’e, ninia sirkulasaun loron-loron atu bele halo manutensaun mai husi osan ne’e, dunik.
Enkuantu, agora Ró ne’e, ba halo manutensaun liu fulan-4 nia la iha rendimentu ba ninia an atu bele sustenta iha perioudu-1 tomak.(any)
