Kapasita Emprezáriu Timor-oan Hasa’e Kapasidade Hari’i Parseria Negósiu ho Austrália no Rejiaun AZIA

Ekonomia, Nasional2934 Views
banner 468x60

Dilipost.com– Atu hasa’e kapsidade liu husi formasaun ne’ebe partisipa husi empreza Timor-oan nain 39, ho aprezenta sira nia negósiu no prepara an ba oportunidade halo parseria komérsiu ho empreza sira husi Austrália no reziaun AZIA.

Formasaun ne’e nu’udar parte ida husi preparasaun ba Fórum Negósiu Invest Timor-Leste, ne’ebé sei hala’o iha loron 29 fulan Outubru 2026. Atu promove komérsiu no investimentu bilateral entre Timor-Leste no Austrália.

banner 336x280

Eventu ne’e hetan apoiu husi Governu Austrália no parseria ho Vice-Primeiru-Ministru Timor-Leste, Ministru Koordenadór Asuntu Ekonómiku no Ministru Turizmu no Ambiente, TradeInvest Timor-Leste, no Câmara do Comércio e Indústria de Timor-Leste.

Empreza sira ne’ebé partisipa identifika liuhusi prosesu halo manifestasaun interese no peskiza ba negósiu, ne’ebé lidera husi Câmara do Comércio e Indústria de Timor-Leste no TradeInvest Timor-Leste.

Liu husi workshop ne’ebé hala’o durante loron-ida ho objetivu ajuda empreza sira define valór husi sira-nia proposta, dezenvolve no pratika apresentasaun negósiu ne’ebé badak no klaru no hadi’a materiá sira ne’ebé sei uza bainhira halo kontaktu ho parseiru no investidór potensial sira.

Iha workshop empreza sira ne’ebé selesionadu sei hetan akompañamentu individual atu hadi’a sira-nia proposta negósiu no prepara an ba diskusaun ho parseiru komersiál no investidór potensial sira.

Bainhira identifika ona oportunidade halo parseria ne’ebé apropriadu, empreza sira sei hetan oportunidade hasoru no halo reuniaun ho empreza Australianu sira ne’ebé sei mai vizita Timor-Leste durante Forum Negósiu Invest Timor-Leste.

Tuir Konselleira Embaixada Austrália, Fabia Shah hateten parseria komersiál ne’ebé forte hahú bainhira empreza sira komprende ho klaru saida mak sira bele oferese ba malu.

“Programa ne’e ajuda empreza timoroan sira atu hadi’a sira-nia proposta no prepara an ba konversa prátika ho empreza Australianu sira kona-ba oportunidade iha komérsiu, investimentu no parseria,” subliña Fabia, bainhira partisipa iha fatin formasaun horseik.

Nia hatutan formasaun ne’e fó ba partisipante sira koñesimentu no kapasidade prátika ne’ebé sira bele kontinua aplika iha futuru, liuliu iha dezenvolvimentu negósiu, no halo interasaun ho investidór sira no negosiasaun komersiál.

Fatin hanesan Diretór Ezekutivu Trade Invest Timor-Leste, Duilio Araujo relata kona ba benefísiu husi programa ida-ne’e la limita de’it ba partisipasaun iha forum negósiu.

“Ami hakarak ajuda empreza Timor-oan sira dezenvolve koñesimentu, abilidade no konfiansa ne’ebé sira bele uza ba tempu naruk, hodi identifika oportunidade negósiu sira, aprezenta proposta komersiál ne’ebé forte no dezenvolve parseria ho empreza no investidór sira iha Austrália, iha ASEAN no iha merkadu internasionál sira seluk,” afirma Duilio.

Invest Timor-Leste 2026 realiza bazeia ba rezultadu no aprendizajen sira husi eventu Timor-Leste–Australia Economic and Business Conferences ne’ebé hala’o iha tinan 2024 no 2025.

Programa ne’e mós buka atu haburas no haforsa envolvimentu komersiál entre Austrália no Timor-Leste, liuliu iha setór agronegósiu, turizmu no enerjia renovável. (**)

banner 336x280

Leave a Reply

Your email address will not be published. Required fields are marked *