Dílipost.com, Loron 14 Juñu 2026– Konsellu Imprensa Timor-Leste (CI-TL), Realiza formasaun hakerek feature ne’ebé organiza husi konsellu imprensa ho partisipasaun jornalista 19 husi média oioin nia objetivu mak atu hasa’e kapasidade jornalista sira iha produz notísia feature ho estrutura no konteúdu ne’ebé di’ak, atu bele kontribui ba dezenvolvimentu no motivasaun ba sosiedade Timor-Leste.
Prezidente Interina Konsellu Imprensa Timor-Leste (CI-TL), Suzana Cardoso, hatete katak objetivu husi formasaun hakerek feature ne’e mak atu hasa’e kapasidade jornalista sira tanba durante ne’e hakerek feature seidauk barak no balu la tuir estrutura no konteúdu ne’ebé loos.
“Formasaun ida ne’e realiza atu fó koñesimentu kona-ba hakerek feature. Ami hakarak jornalista sanulu resin sia ne’ebé reprezenta média sira bele implementa iha sira-nia fatin servisu,” dehan Suzana Cardoso ba jornalista sira ih konsellu imprensa.
Prezidente Interina hatutan, profisaun jornalista la’ós de’it atu hakerek notísia kona-ba serimónia ka asuntu hard news sira, maibé mós importante atu produz soft news ka feature sira ne’ebé bele fó inspirasaun no motivasaun ba dezenvolvimentu Timor-Leste ne’ebé hela iha faze konstrusaun.
Suzana esplika katak feature mak tipu hakerek ida ne’ebé tenki klaru, interessante no bele lori motivasaun ba públiku liuhosi istória, situasaun ka ezemplu pozitivu sira ne’ebé suporta progresu no dezenvolvimentu.
“Ha’u nia mensajen ba jornalista sira ne’ebé partisipa iha formasaun ida ne’e, maski tempu formasaun badak tebes no seidauk sufisiente, maibé iha era dijitál agora ita-boot sira bele kontinua aprende rasik no aprofunda liu tan koñesimentu ne’ebé hetan ona,” nia esplika.
Nia mos rekoñese katak jornalista balu sei hasoru difikuldade iha utilizasaun língua Inglés, Portugés no Indonéziu. Maibé, tuir nia, atualmente iha ona fasilidade tradusaun dijitál hanesan Google Translate ne’ebé bele ajuda jornalista sira atu hakerek no komprende informasaun ho di’ak liu.
Suzana espera katak iha futuru jornalista sira la’ós de’it sai hanesan transmisaun informasaun, maibé mós bele sai autor livru, peskizador no formador ne’ebé kontribui ba dezenvolvimentu setor jornalístiku iha Timor-Leste.
Formasaun ne’e partisipa husi jornalista sanulu resin sia (19). Programa ida ne’e mak faze daruak husi série treinamentu ne’ebé CI-TL prepara. Tuir planu, sei iha tan formasaun kona-ba editorial, verifikasaun faktu (fact-checking), feature ba televizaun, formasaun ba proprietáriu média sira no área justisa. Programa sei kontinua to’o fulan Setembru 2026.
Iha oportunidade hanesan ne’e, jornalista husi Hatutan.com, Juvinal Cabral dos Santos, apresia programa formasaun ida ne’e tanba fó benefísiu boot ba jornalista sira ne’ebé partisipa.
” Hanesan Jornalista Aprende kona-bá Feature, dala barak ami la hatene oinsa atu hakerek sai Feature, maibé durante ne’e ami foti de’it ema nia ko’alia, maibé husi formasaun ne’e ami bele hatene ona katak ami la bele foti isu sira ne’ebé mak fontes ko’alia ba ita, maibé foti mós observasaun husi situasaun sira ne’ebé iha, tenki bazeia ba dadus no faktus,”
Nia esplika tan katak metodu feature balu hanesan investigativu ne’ebé husu jornalista atu buka klean liu kona-ba asuntu ida, observa situasaun real no identifika problema ka faktu sira ne’ebé relevante ba públiku.
“Formasaun ne’e importante tebes ba ami tanba ami aprende estrutura feature, oinsá hakerek títulu ne’ebé atrativu no oinsá konta ema ida-nia istória atu leitor sira mos sente interese atu lee,” nia dehan.
Representa jornalista sanulu resin sia ne’ebé partisipa iha treinamentu ne’e, Juvinal agradese ba formador sira ne’ebé durante loron lima fó apoiu no akompaña prosesu aprendizajen. Nia mos husu deskulpa karik iha partisipante balu ne’ebé seidauk partisipa máximu durante treinamentu ne’e.
Jornalista: Azacsi Quintão
