OEKUSI-DÍLI Post News, 28 Novembro 2025 – Primeiru-Ministru (PM), Kay Rala Xanana Gusmão, ohin atribui setifikadu títulu na’in ba rai ba komunidade 205 iha ámbitu komemorasaun loron proklamasaun independénsia ba dala 50 iha Rejiaun Administrativa Espesiál Oekusi Ambeno (RAEOA).
Iha biban ne’e, Diretór Diresaun Rejionál Terras Propriedade Oekusi, José Ase Neno Colo, esplika ba Primeiru-Ministru katak, benefisiáriu na’in-205 ne’e mai husi suku ha’at(4), suku Naimeko, Lalisuk, Lifau perténsia sub-rejiaun Pante Makasar no suku Suni-Ufe sub-rejiaun Nítibe.
Nia hateten prosesu atribuisaun bazea ba lei númeru 13/2017, ne’ebé antes Sekretáriu Estadu Terras no Propriedade (SETP) liu-husi ekipa tékniku Sistema Nasionál Kadastru (SNC) hamutuk Diresaun Rejionál Terras no Propriedade Oekusi halo levantamentu kadastru ba komunidade 200 iha suku referida.
“Atribuisaun sertifikadu títulu ba suku ha’at, prosesu kontinuasaun husi SNC nian, halo levantementu ba sira-ne’ebé laiha disputa iha tinan hirak liu ba, foin dau-daun ita halo reverifikasaun fila-fali, laiha ona disputa, ne’e mak ohin Primeiru-Ministru simbolika de’it ba 44 hodi reprezenta 205 husi suku ha’at(4), depois mak ita sei kontinua atribui iha efidisíu terras propriedade,” hateten nia iha seremónia atribuisaun iha kampu 01 de Maiu Palaban sesta(28/11/2025).
Komunidade Domingos Tefa nu’udar na’in ba rai, husi suku Naimeko, agradese ba Governu tanba prosesu levanatmentu husi ekipa SNC tinan barak.
“ ohin bele simu ha’u-nia direitu lolo’os ne’ebé ami hein tinan barak ona, ami agradese ba IX Governu liu-husi ekipa tékniku tanba antes ne’e sukat ami-nia rai iha suku, to’o ohin ami bele simu iha selebrasaun loron proklamasaun ne’e,” hakotu nia.
Jornalista : Ercia
