DiliPost.com-Forma juven ho karakter emprendedor, inovativu no independente liu husi Fakuldade haat (4), eziste iha Institute of Bussines (IOB), sa’i tema prinsipal ba orientasaun tinan Akademiku 2024.
Atividade orientasaun tinan Akademiku 2024 hala’o durante loron tolu (3), iha IOB ho tema prinsipal, la’o ho di’ak. Estudante ne’ebe tu’ir orientasaun durante loron hirak ne’e, kuaze 800 ital. Maioria husi Fakuldade Informasaun Komunikasaun no Teknolojia (ICT), no Fakuldade Ekonomia. Informa Prezidente Komisaun Organizadora Leonito Silva da Costa ba Dili Post online, iha Salaun Multifunsan IOB Fomento II, foin lalais ne’e.
Nia hatutan, hanesan Prezidente Komisaun Organizadora,”ha’u sente kontente. Tanba, realizasaun ba atividade orientasaun tinan ida ne’e, ho tema ‘Forma Juven ho Karakter Emprendedor, Inovativu no Independente iha area ICT, Ekonomia, Turizmu no Enjenaria ba Timor-Leste (TL),’ la’o ho sussesu.
Estudante sira ne’ebe tu’ir orientasaun ne’e, kuaze 800 ital, barak liu husi ICT no Ekonomia i husi Departamentu Teknika Informátika.
Problema
Maski iha problema uitoan entre sira iha parte enkontru, tanba deferente ideias, maibe ba atividade orientasaun la’o ho di’ak no sussesu hahu husi loron primeiru dia (06/08/2024), ba loron da-huluk Mágnifiku Reitor IOB, Pedro Barreto Ximenes halo introdusaun badak konaba Instutuisaun ba Estudantes ho vizaun no misaun. Ba loron da-ruak, bazeia ba tema husi orientasaun ne’e rasik, iha Seminariu, komisaun konvida Emprezariu Mariano da Costa Alves hanesan nain ba Empreza ‘Kafé Atsabe’ hodi fahe esperiensia ba Estudante sira oinsa atu hari’i Empreza ou sa’i Emprezáriu tenke iha espíritu badinas no fi’ar an.
Maneiza
La’os de’it Estranjeirus, maibe Timor-Oan rasik mos iha kapasidade atu maneiza nia Produtu rasik. Hodi hari’i Empreza ki’ik oan sira atu dezenvolve Produtu ne’e. Nune’e, bele esporta ba ra’i liur. Aleinde ne’e, komisaun konvida mos Diretur Ezekutivu Institutu Apoiu Dezenvolvimentu Emprezarial (IADE), Filomeno Marcelino Belo hodi, introduz papel IADE, oinsa IADE nia apoiu ba Empreza sira ein termus Jestaun, Fundus, Materias no oinsa atu sa’i Emprezáriu sussesu iha futuru.
Iha loron ikus orientasaun, komisaun konvida Dekanu no Xefi Departamentu sira hodi halo introdusaun ho vizaun no misaun ba Estudantes kada Fakuldade no Departamentu.
Ba atividade orientasaun durante loron 3 inklui loron 2 ‘Galadi Bersih,’ durante loron 5 komisaun gasta orsamentu ho total $ 6,429. 50 centavus.
Hanesan jerasaun foun no jestor Kampuz Agusto da Costa no Xefi Laboratoriu Trinito da Silva Amaral hodi halo introdusaun ba Estudante foun sira atu hatene ambiente Kampuz no utilizasaun ba fasilidades hotu iha kampuz.(leya)
