Dílipost.com, Loron 02 Juñu 2026 – Ekipa Validasaun Dadus ba Frente Externa entrega ona lista Veteranus hamutuk nain 118 ba Ministériu Asuntu Kombatentes Libertasaun Nasionál (MAKLN) atu halo verifikasaun final ho Konsellu Kombatentes Libertasaun Nasionál (CCLN) molok publika ofisialmente ba públiku. Lista refere inklui kandidatu sira ho nivel partisipasaun diferente durante luta libertasaun nasionál no sei liu hosi prosesu reklamasaun no kontestasaun tuir lei antes sai definitivu.
Ministru Asuntu Kombatentes Libertasaun Nasionál (MAKLN), Gil da Costa “Oan Soru”, hatete katak ekipa validasaun remata ona servisu identifikasaun no validasaun ba dadus veteranus sira hosi frente externa no entrega ona rezultadu ba MAKLN atu kontinua prosesu legal sira.
“Dadus ne’e seidauk anúnsia ba públiku. Agora lista veteranus hamutuk na’in 118 entrega ona ba Ministériu Asuntu Kombatentes Libertasaun Nasionál. Depois, MAKLN hamutuk ho Konsellu Kombatentes Libertasaun Nasionál sei halo verifikasaun final molok publika edital ba públiku,” hateten MAKLN Gil da Costa ba jornalista sira iha Salaun 3 de Marsu Maubai, Komoro.
Nia hatutan, lista ne’e inklui ema sira ho durasaun partisipasaun diferente durante luta libertasaun nasionál. Dadus hotu-hotu sei hetan verifikasaun ikus antes hetan aprovasaun ofisiál hosi lideransa Konsellu Kombatentes Libertasaun Nasionál (CCLN).
Nia esplika katak klasifikasaun veteranus sira bazeia ba períodu partisipasaun durante luta ba independénsia. Eskala ida refere ba ema sira ne’ebé partisipa entre tinan 20 to’o 24, enkuantu eskala seluk sira refere ba períodu partisipasaun ne’ebé menus.
“Rekoñesimentu nu’udar kombatente tenke tuir Estatutu Kombatentes Libertasaun Nasionál. Minimu partisipasaun ne’ebé konsidera ba rekoñesimentu mak tinan tolu tuir Artigu 4. Kuandu la to’o períodu ne’e, partisipasaun ne’e konsidera de’it nu’udar partisipasaun jerál, la’ós dedikasaun ekskluziva,” dehan nia.
Governante subliña katak identifikasaun ba naran sira ne’ebé tama iha lista refere la’ós halo diretamente hosi Ministériu, maibé rezultadu hosi servisu ekipa validasaun independente ne’ebé nomeadu atu hala’o prosesu ne’e.
“La’ós Ministru mak identifika ema sira. Ministru lidera de’it instituisaun ne’ebé tutela área ida-ne’e. Ekipa validasaun mak halo identifikasaun no verifikasaun tuir prosedimentu ne’ebé estabelese ona,” katak nia.
Nia akrescenta tan katak depois lista ne’e publika ba públiku, sidadaun sira sei iha oportunidade atu hato’o reklamasaun, kontestasaun ka protestu ruma tuir mekanismu legal ne’ebé vigor.
“Kuandu lista taka ba públiku, ema hotu-hotu sei iha direitu atu halo reklamasaun no kontestasaun tuir lei. Depois de remata períodu reklamasaun no la iha tan kontestasaun, mak lista ne’e bele konsidera nu’udar definitivu,” reafirma nia.
Prosesu verifikasaun dadus veteranus frente externa realiza durante loron rua iha Salaun Tres de Marsu Maubai, hahú hosi loron 1 to’o 2 Juñu 2026.
Ekipa validasaun ne’e lidera hosi Sekretáriu-Jerál Partidu FRETILIN, Mari Alkatiri, ho partisipasaun hosi Agio Pereira, Estanislau Aleixo da Silva, Vise-Presidente Terceira CCLN Inês de Almeida no membru sira seluk.
MAKLN espera katak prosesu verifikasaun no publikasaun lista ne’e bele hala’o ho transparénsia no tuir dispozisaun legal sira atu garante rekoñesimentu ba kombatente libertasaun nasionál sira ne’ebé kontribui ba independénsia Timor-Leste.
Jornalista : Azacsi Quintão
