Dílipost.com, Loron 02/02/2026– Primeiru-Ministru (PM), Kay Rala Xanana Gusmão, husu ba Komandu Polísia Nasionál Timor-Leste (PNTL) atu prosesa lalais ho rigor ba autór sira ne’ebé envolve iha asaun krime tuda rahun ekipamentu pezadu pertense ba empreza Rubic Unipessoal, Lda, ne’ebé daudaun uza hodi hala’o servisu alargamentu estrada protokolu iha área Becora, Munisípiu Díli.
Primeiru-Ministru Xanana Gusmão hateten katak governu la bele tolera asaun vandalizmu ka krime ne’ebé labele halo prejuízu materiál ba empreza ne’ebé hala’o servisu públiku, maibé mos bele atraza implementasaun projetu estratéjiku Governu ne’ebé atu benefisia diretamente komunidade.
Nia enfatiza katak prosesu legal tenke hala’o tuir lei, transparante no responsavel, atu bele hatene lolo’os kronolojia insidente, motivu hosi asaun ne’e, no responsabiliza ema hotu-hotu ne’ebé envolve.
informasaun hosi autoridade seguransa, atualmente PNTL detein ona autór sira iha eskuadra Becora nian. Autór sira ne’e daudaun hein atu submete ba prosesu investigasaun, inklui rekolla prova, testemuña sira no prosedimentu legal seluk, antes submete ba Ministériu Públiku atu kontinua prosesu tuir mekanizmu lei penal ne’ebé vigora iha Nasuan ne’e.
IX Governu Konstitusionál konsidera projetu alargamentu estrada Becora hanesan ida husi prioridade infrastrutura urbanu, tanba área ne’e iha movimentu transporte públiku no privadu a’as tebes, ne’ebé dala barak halo engarrafamentu no problema tráfiku, liu-liu iha oras dader no lokraik.
Ho alargamentu estrada, Governu espera bele hamenus tempu viajen, aumenta fluidez tráfiku no mellora kondisaun mobilidade ba komunidade iha área ne’e.
Alende redús engarrafamentu, projetu ne’e mos foka ba hasa’e seguransa ba motorista no ema la’o ain, liu-liu labarik sira no ferik sira ne’ebé uza estrada loron-loron.
Governu mos planea atu aumenta kapasidade estrada hodi bele simu transporte públiku barak-liu, inklui mikrolete no bis, hodi responde ba kresimentu populasaun no movimentu ekonómiku iha área Becora no sirkunvizinansa.
Projetu alargamentu estrada Becora mos inklui hadia no reabilitasaun sistema drainajen, ne’ebé importante tebes atu prevene inundasaun iha tempu udan.
Problema inundasaun iha área ne’e dala barak halo prejuízu ba ema nai-uma no negósiu lokál sira, tanba ne’e Governu konsidera melloria drainajen hanesan parte integrál husi dezenvolvimentu infrastrutura sustentável.
Husi perspetiva dezenvolvimentu ekonómiku, alargamentu estrada ne’e sei fasilita asesu komunidade ba merkadu, eskola, servisu públiku no privadu, no sei fó oportunidade ba atividade ekonómika lokál atu dezenvolve liu-tan.
Governu espera katak infrastrutura estrada sei kontribui ba hadia kondisaun moris komunidade no hasa’e dinamika ekonómika iha kapitál Díli.
Molok hahú servisu konstrusaun, Governu, lidera hosi Primeiru-Ministru rasik, akompaña hosi ekipa konjunta kompostu husi Ministériu Obras Públikas (MOP), Sekretaria Estadu Assuntu Toponímia no Organizasaun Urbana (SEATOU) no Autoridade Munisípiu Díli, hala’o ona prosesu sosializasaun ba populasaun iha área Becora.
Sosializasaun ne’e ho objetivu atu fó informasaun klaru kona-ba prosesu alargamentu estrada, impaktu temporáriu ne’ebé bele mosu, no benefísiu longu prazú ne’ebé komunidade sei hetan hosi projetu ida-ne’e.
Governu reafirma kompromisu atu kontinua implementa projetu infrastrutura públiku ho prinsípiu legalidade, seguransa no partisipasaun komunidade, no mos husu ba ema hotu-hotu atu suporta no halo kolaborasaun hodi garante katak projetu sira ne’ebé destina ba interese públiku bele lao ho diak no la hetan interferénsia hosi asaun krime.
JORNALISTA : Dilipost.com
