MALÁZIA, DiliPost.com- Timor-Leste (TL) ofisialmente submete ona Instrumentu Adezaun bá Karta ASEAN no Akordu Zona Livre hosi Arma Nuklear Sudeste Aziátiku (SEANWFZ), nune’e ratifika inkluzaun nasaun nian nu’udár membru da-11 hosi órgaun rejionál ne’e.
Ministru Negósiu Estranjeiru Malázia, Datuk Seri Mohamad Hasan konsidera eventu ne’e hanesan momentu istóriku ida ne’ebé haree espansaun hosi ámbitu ASEAN nian hodi inklui nasaun soberanu hotu-hotu iha Sudeste Aziátiku.
“Ida ne’e hanesan momentu istóriku ida ne’ebé ita selebra ohin,” Datuk Seri Mohamad Hasan hateten iha ámbitu serimónia entrega instrumentu ne’e, sábadu (25/10/2025).
Mohamad haktuir katak nu’udár Prezidente ASEAN, hamutuk ho nasaun membru sira seluk, hato’o parabéns ida bá povu Timor-Leste.
“Ohin ami selebra, nasaun ida ne’ebé harii iha korajen, fortaleza no esperansa ne’ebé nunka lakon ne’ebé ami hein kleur imi-nia adezaun tomak. Bemvindu bá família ASEAN nian no bá karta ne’ebé ami simu ona,”teni Datuk Seri.
Instrumentu Adezaun bá Karta ASEAN SEANWFZ ne’e submete direta hosi Ministru Negósiu Estranjeiru no Kooperasaun (MNEK) Timor-Keste, Bendito dos Santos Freitas.(Aza)
