DiliPost.com-Maske hare husi dok sarani Timor Oan haksolok no balun hamonu matawen tanba bele hare direitamente Santu Papa Francisco ho matan rasik, hanesan Grasa boot ne’ebe hein durante tinan barak nia laran.
Povu Timor oan sira ne’ebe hanesan sarani katolika hahu husi labarik kiik,katuas Ferik nomos Joventude sira hotu nomos kumunidade sira husi reliziaum seluk hamrik iha estrada ibun dalan protokolu hodi hein santidade Papa Fransisco liu,ho kontenti to’o balun hamonu matawen wainhira santidade papa Fransisco liu iha sira nia oin,maske la kaer liman no la bensa santidade papa nia liman.
Maibe, sente simu grasa husi Amu santidade Papa Fransisco tanba bele fo ona bensaun ba sira hotu.
Sarani Alberto Martins ho matawen kontenti hatete oportunidade boot ba nia ho nia Familia sira bele hare rasik ho matan no bele hetan bensaun husi santidade Papa Fransisco nia maske husi dok.
Tanba durante tinan barak sira hare deit Amu Papa Fransisco husi Televizaun deit, maibe ohin loron sira bele hare rasik ho matan.
“Hau kontenti liu tanba bele hare ho matan nomos bele simu bensaun husi amu papa rasik,ida ne’e hanesan grasa ida ba ami tanba bele iha oportunidade hare amu papa ho matan rasik,tanba tinan barak hare deit amu papa iha televizaun,sente orgulho no kontenti tebes,”dehan Alberto Martins ba DILI Post online iha Komoro Dili,Segunda (9/9) ohin.
Nia hatutan iha nia moris tomak laiha tan oportunidade ba nia atu bele simu tan amu papa hanesan dadaun nee,tanba amu papa nia vizita hanesan,milagre ida ne’ebe ema husi Nasaun sira seluk mos hein hela.
Iha fatin hanesan Martina Mendonsa sente triste ladun hare mos Amu Papa nia oin ema barak liu no kareta ne’ebe tula amu Papa halai makas,maibe nia nafatin agradese tanba bele simu amu Papa Fransisco hamutuk ho maluk sarani sira seluk.
“Ami iha kotuk hare ladun hetan,maibe hau nafatin agradese tanba bele simu amu Papa Fransisco hamutuk ho maluk sarani sira ohin loron,maske ladun hare hetan. Maibe, kontenti tanba bele hetan grasa bensaun husi Amu Papa rasik ne’e hanesan milagre ida ba hau,”tenik Martina.
Nia hatete Amu Papa Fransisco hanesan santu padre,ne’ebe mak hanesan Aman ba uma kreda Katolika iha mundu tomak,no hanesan mos ain liman husi Nain Jesus Kristu nian,hodi tau matan ba ssrani sira iha mundu tomak nomos lori Dame no Domin ema hotu hanesan kriatura Maromak nian,nafatin hari Dame no Paz.
Nune’e mos komunidade Charles da Costa hateten povu Timor oan Barak liu ho antusismo simu santidade papa Francisco halo estrada sai klot,espasu ba santidade Papa ho kareta liu neneik ladun diak,tanba sarani sira barak liu maibe ho esforsu husi parte seguransa nomos eskoltu sira konsege papa ho kareta liu diak.
“Hau kontente nakonu ho Matawen tanba bele hare santidade papa mai vizita ita nia rain,maibe hau mos triste ituan tanba sarani sira barak liu mak hamrik iha estrada hodi taka tomak,atu la fo espasu ba Papa Fransisco ho kareta liu,hau tauk mak kareta ne’ebe tula amu papa halai neneik sarani sira ba hobur pasencia amu Papa liu mos araska tanba sarani sira hakarak bensa amu papa nia liman,maibe grasa dedeus ho esforsu eskoltu nomos parte seguransa sira halai kareta makas konsege amu Papa liu ho diak,hau kontenti tebes,”sublina Charles.
Iha observasaun Dili Post online iha trenu hare katak Amu Papa Fransisco to’o iha Aeroportu Prezidente Nikolau Lobato, tuku 2:18 oras Timor-Leste ho aviaun AIR Neugine,ne’ebe amu Papa hamutuk ho delegasaun husi Vatikano tun iha Aiviaon simu direta husi Prezidente Republika Jose Ramos Horta,Primeiru Ministru Kay Rala Xanana Gusmao hamutuk ho amu Bispo Dom Virgilio Cortereal Do Carmo da Silva nomos Bispo sira husi Vatikano iha Timor-Leste inklui Membru Governu sira,no Santidade Papa Francisco sai husi Aeroportu VIP parte Protokolu Haruka Santidade Papa Fransisco sae kedas kareta ne’ebe mak parte komisaun prepara,akompana kedas husi parte seguransa husi Forsa Defeza Timor-Leste (F-FDTL) nomos Polisia Nasional Timor Leste (PNTL)ba to’o iha Nunsitura Apostolika.(aldo)
