Dílipost.com, Loron 31 Maiu 2026 – Prezidente Organizasaun Feto Verdes (OFV), Aurea Simões, afirma katak tomada pose ne’ebé realiza ohin sai hanesan responsabilidade foun atu lidera no hametin servisu organizasaun hodi apoia programa no objetivu Partidu Os Verdes de Timor (PVT).
Iha nia diskursu iha Salaun Larigutu, CNE, Aurea Simões dehan katak knaar ne’e la’os de’it kona-ba pozisaun lideransa, maibé oportunidade atu halibur feto sira iha teritoriu tomak hodi fó kontribuisaun ba dezenvolvimentu partidu.
“Ami simu knaar ida ne’e la’os atu sai boot de’it, maibé atu halibur ami nia feto maluk sira iha teritoriu tomak atu halo servisu ba Partidu Os Verdes de Timor no luta hamutuk ba objetivu 2028,” hateten Aurea Simões.
Tomada pose ne’e partisipa husi membru Organizasaun Feto Verdes no komissáriu polítiku sira hamutuk ema nain 50. Partisipante sira hatudu sira nia kompromisu atu servisu maka’as no kontribui ba futuru partidu nian.
Aurea Simões, partisipasaun feto iha vida polítika importante tebes tanba bele promove paz, dame no estabilidade iha partidu no nasaun. Nia mos subliña katak feto sira iha papel importante atu fó kontribuisaun iha setor ekonomia no sosiál.
“Feto mak naroman ba ema hotu. Feto kaer responsabilidade barak no kontinua defende igualdade jéneru atu feto no mane iha direitu no devér hanesan iha vida polítika,” nia dehan.
Iha oportunidade ne’ebé hanesan, Prezidente Partidu Os Verdes de Timor (PVT), Antonio Lela Huno Cruz, fó parabéns ba estrutura Organizasaun Feto Verdes ne’ebé simu ona tomada pose.
Antonio Lela Huno Cruz esplika katak atualmente PVT iha organizasaun afiliada hamutuk 15 ne’ebé organiza an ho forma independente no iha estrutura iha nivel nasionál no munisipál.
Nia dehan katak partidu sei kontinua hametin kuadru sira no baze massa hodi prepara-an ba dezafiu polítiku iha futuru.
“Agora Os Verdes sei konsentra ba harii partidu kuadru no kombina ho forsa massa. Ami hakarak hametin militante sira iha núkleu família Verdes atu partidu bele sai forte liu tan,” dehan Prezidente PVT.
Prezidente PVT mos informa katak durante tinan 2026 partidu sei fó prioridade ba konsolidasaun estrutura iha nivel nasionál no munisípiu sira.
Iha nia mensajen ikus, Antonio Lela Huno Cruz husu ba Organizasaun Feto Verdes atu kontinua tun ba baze hodi fó mensajen unidade ba família Verdes sira.
“Ha’u husu ba Organizasaun Feto Verdes atu tún ba baze no fó mensajen ba família Verdes sira katak ita hotu tenki la’o hamutuk hodi haree ba futuru ida di’ak liu,” nia konklui.
Jornalista : Azacsi Quintão
