DiliPost.com-Mosu problema asaltu malun, iha baliza Aldeia Uaturou no Aldeia Maucale, Suku Gariuai, Postu Administrativu Baucau-Vila, Munisípiu Baucau, rezulta motór ho marka Mega-Pro hetan sunu mutuk husi ema dezkoñesidu.
Liu husi dada lia ho Carlos Boavida nu’udar vitima haktu’ir, nia motor ho marka Mega-Pro ho nuneru xapa matrikula ‘Plat’ B-6962, uza hus oan ZMB (17), bainhira fila husi ke’e rai ku’ak iha Semitériu Lawa-Lubu Gari-Uai atu hakoi Avo nia mate isin.
Iha momentu ne’eba teki-teki la sente iha Estrada Públiku baliza entre Aldeia Uatu-Rou ho Mau-Cale, Suku Gari-Uai akontese asaun tuda no taka dalan purvolta tuku 06:30 lorokaik Otl. Husi ema dezkoñesidu no sunu motor to’o mutuk. Informa nain Motór ba Jornalista iha rezidénsia Aldeia Uatu-Rou, Kuarta ne’e.
Asaun sunu motór bainhira,”ami nia Avo rasik ida mate, ba ke’e rai ku’ak iha rate, bainhira fila husi rate derepente ema tuda uma no tarutu. La hatene sé mak tuda ha’u la hatene.
Iha momentu ne’eba ha’u nia oan lori motor hala’i uluk, ha’u tu’ir la’o de’it no sé mak sunu ha’u la hatene. Tanba, la hare’’e, ha’u hanoin ha’u nia oan hala’i liu tiha ona. Ha’u liu husi kotuk, tanba ta’uk fatuk kona ha’u to’o iha uma família sira dehan ha’u nia motór ema sunu tiha ona,”konta Carlos.
Vitima Triste
Vítima ba akontesimentu ne’e, sente triste no la menta ho asaun ema dezkoñesidu. Tanba ne’e, husu ba parte Seguransa PNTL Munisípiu Baucau atu buka tu’ir autór sunu motor. Tanba motor refere la’os privadu, maibe husi UNIZMA Ativista Pro-RDTL ne’ebé nia uza hodi hala’o bá servisu.
Motor ne’e, UNIZMA nian loron-loron hala’o servisu ba prosesu Restaurasaun ninian mak sira sunu ona kazu agora iha ona Polísia nia liman. Entaun, foin lalais ka’er suspeitu sira hodi prosesu tu’ir Lei.
Komandante Polisia Nasional Timor-Leste (PNTL), Munisípiu Baucau Superintendente Xefi Antónino ‘Mauluta’ hateten, akontesimentu asaltu malun iha Suku Gari-Uai rezulta motór ida hetan sunu mutuk.
Hakalma Situasaun
Parte Komandu PNTL simu informasaun orienta kedas PNTL Eskuadra Postu Administrativu Baucau-Vila hamutuk ho Polísia Task Force no apoiu husi Batalleaun Orden Públiku (BOP), Kompaña Bravo inklui F-FDTL LANUD to’o iha Lokál Akontesimentu hodi hakalma situasaun.
Superintendente Xefi Polísia ne’e afirma, PNTL Sesaun Investigasaun Kriminál Munisípiu Baucau rekolla kedas informasaun husi vítima dezde akontesimentu hodi kalan no identifika ona ema na’in rua (2), ho inisiál JZMF tinan 24 no JABX tinan 21 nu’udar suspeitu tanba ne’e, kontinua prosesu tu’ir dalan legál.
Hodi kalan,”ita foti kedas lezada ou vítima mai parte investigasaun foti sira nia informasaun hodi deklara katak, akontesimentu ne’e, sira fila husi ke’e rai ku’ak atu hakoi nia Avo mak mai to’o iha dalan klaran sira hetan ataka tuda derepente no iha tempu ne’e kedas.
Ita identifika kedas suspeitu na’in 1 no parte Servisu Investigasaun Polísia (SPI), ‘Monitoring’ iha tereñu hala’o identifikasaun to’o ikus identifika kedas suspeitu na’in 2, Polísia ba foti ona agora mai iha Komandu atu kontinua prosesu ba oin,”haktu’ir Mauluta.
Entretantu, motor ho marka Mega-Por ne’ebé sunu mutuk agora asegura ona iha resintu Komandu PNTL Munisípiu Baucau no situasaun atuál iha fatin akontesimentu Suku Gari-Uai daudaun ne’e, la’o kontroladu.(nt)
