DiliPost.com- Kompañia Jigante INPEX Corporation Japaun intersante hakarak hametin kooperasaun hodi investe iha setór minara no gás Timor-Leste nian.
Prezidente no Diretór Ezekutivu Kompañia INPEX Corporation, Takayuki Ueda informa asuntu ne’e durante hala’o enkontru ho Primeiru-Ministru, Kay Rala Xanana Gusmão akompaña hosi Vise-Primeiru-Ministru,Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise no Ministra ba Asuntus ASEAN, Milena Maria da Costa Rangel hamutuk ho Embaixador Japaun ba Timor-Leste, Ilidio da Costa Ximenes iha ótél The Okura Tokyo.
INPEX Corporation nu’udar kompañia jigante ida iha Japaun ne’ebé iha ona esperensia tinan barak hala’o servisu iha dezenvolvimentu indutria mina no gás iha Japaun no dadaun ne’e hala’o investimentu industria enerzia iha nasaun avansadu.
Prezidente Kompañia INPEX Corporation, Takayuki Ueda agradese tebes no sente previleziu hasoru malu ho Xefe Governu Xanana Gusmao ho ekipa tanba bele fó oportunidade hodi ko’alia kona-ba futuru dezenvolvimentu mina no gás.
“Ami ekipa husi INPEX Corporation sente previleziu tebes no biban ne’e agradese ba oportunidade hodi hasoru malu ho ita boot iha momentu ida ne’e. INPEX Corporation hanesan kompañia Japaun nian, hanesan Kompañia boot Japaun nian, ne’ebé durante ne’e halo explorasaun no dezenvolve mina no gás no ida ne’e foin primeira vez ba kompañia Inpex Coorporation hodi hasoru malu ho primeiru-ministru” informa prezidente kompania takayuki ueda durante ekontru ho pm xanana iha ótel The Okura Yokyo-Japaun.
Entretantu, Primeiru-Ministru Kay Rala Xanana Gusmão hato’o agradese no hala’o esplikasaun klean hodi konvida direita INPEX Corporation atu hala’o vizita mai Timor-Leste no hodi haree direita kondisaun Timor-Leste no ba futuru bele loke investimentu mina no gás iha Timor-Leste.
Estadu Timor-Leste liu hosi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.(Javel)