DiliPost.com— Kardeál Dom Virgílio do Carmo da Silva, SDB, konvida sarani no povu Timor-Leste tomak atu uza loron 31 Dezembru nu’udar momentu kle’an ba reflesaun nasionál. Aleinde selebra loron ikus tinan nian, Kardeál katak loron ne’e iha signifikadu bo’ot tanba marka mós loron ba Eróis sira.
Iha ninia mensajen ba jornalista sira iha Lesidere, Dili, Kardeál hato’o katak ezemplu moris husi erói sira nian tenke sai naroman ba jerasaun foun sira.
Eroi sira nu’udar Modelu ba Sakrifísiu
Kardeál Virgílio hatete katak erói sira fó hotu sira-nia an ba rain ne’e tanba sira tau interese povu no nasaun nian aas liu hotu.
”Ita hotu hatene ita-nia erói sira. Aproveita tempu forte ida ne’e ba reflesaun, hodi hare ba sira nu’udar modelu. Ba sira-nia sakrifísiu no dedikasaun, sira haluha buat hotu-hotu maibé hanoin de’it buat ida: liberdade, paz, no interese povu nian,” dehan Kardeál Dom Virgílio ba Iha ninia mensajen ba jornalista sira iha Lesidere, Dili, Segunda-feira(29/12/2025).
Iha mós apelu ba sarani sira atu la haluha reza ba erói sira ne’ebé Maromak bolu ona, atu sira bele hetan fatin ne’ebé di’ak iha Maromak nia sorin kuanan. Ba sira ne’ebé sei moris, Kardeál husu atu Maromak kontinua haraik bensa, sabedoria, no matenek hodi kontinua sai ezemplu ba dezenvolvimentu rai laran.
Apelu ba Juventude
Kardeál mós hato’o mensajen espesiál ba foin-sa’e Timor-oan sira. Nia husu ba joven sira atu “tane aas” sakrifísiu ne’ebé erói sira husik hela.
Tuir nia, joven sira mak iha responsabilidade atu garante kontinuidade ba luta no vizaun ne’ebé erói sira mehi ona ba Timor-Leste.
Hafoin loron 31 Dezembru, Kardeál mós fó hanoin katak loron 1 Janeiru sei selebra nu’udar Loron Mundiál ba Paz, momentu ida ne’ebé importante tebes hodi hahú tinan foun ho fuan ne’ebé nakonu ho dame no unidade.
Jornalista : Azacsi Quintao
