DiliPost.com-Prezidente Repúblika (PR), Jose Ramos Horta liu, husi Diresaun Sosiédade Sivil no Assuntu Sosial (DSSAS), entrega uma-1. Ba feto faluk ho nia oan na’in-7, iha Suku Dotik, Postu Administrativu Alas, Munisípiu Manufahi ho objetivu oferese mahon ho dignidade no hari’i sira nia esperansa.
Asesór Sosiedade Sivil no Assuntu Sosial (ASSAS), Quintiliano Moniz hateten, ohin entrega uma mahon-1 ba faluk-1 ho nia oan nain-7 tanba, bazeia ba proposta ne’ebé hato’o husi Xefi Suku katak, faluk.
Ohin,”ita entrega uma ne’e, ba ita nia oan ita nia alin na’in-7 no sira nia mama ne’ebé faluk. Ita mós oferese Kios-1 ba sira, sira bele halo negósiu bele atende daudaun nesésidade loron-loron nian.
Ekipa
Kios ne’e, entrega ba sira no kada fulan-3 ekipa Palásiu Prezidénsial kontinua halo observasaun hodi hare’e ninia progresu. Kuandu sa’e se’i aumenta sira ninia lukru ba oin,”hateten Quintiliano ba Dili Post, iha Dotik, foin lalais ne’e.
Quintiliano tatoli hela mensajen husi PR-Horta, ba oan kiak nain-7 no feto faluk, atu kuidadu uma ne’e, ho responsabilidade atu fó mahon ba sira. Mensajen hato’o husi PR-Horta ba oan ki’ak na’in-7, uma ne’ebe refere hahu ohin loron uma sira nian, atu simu ho responsabilidade ho kuidadu.
Hakma’an
Biban hanesan, Xefi Suku Dotik, Adelino da Costa Amaral agradese, ba PR-Horta ho ninia ekipa ne’ebé fó ona apoiu atu bele hakma’an ona feto faluk no oan ki’ak sira ninia sofrementu.
Adelino akresenta, hanesan Xefi Suku ba programa no planu PR nian, tanba ho inisiativa tulun feto faluk no oan ki’ik sira no inan-aman hirak ne’ebé kbi’it la to’o, PR la taka matan.
Naruk
“Ha’u lori komunidade nia naran hato’o agradese ba PR nia tulun bele hakma’an feto faluk no oan ki’ak sira hasoru durante tinan naruk nia laran. Oan ki’ak nain-7 ne’e, la iha Ekonómia no kondisaun ne’ebé sufisiente atu sira kontinua ba estudu,”dehan Xefi Suku Dotik- Adelino.
Xefi Suku konta, verdade durante tinan naruk nia laran, inan faluk ne’ebé ho kondisaun defisiensia mental, ho oan na’in-7, sira enfrenta problema. Ho ida ne’e, bin deside para Eskola tanba troka fali nia inan nia fatin hodi sustenta fali nia alin sira. Maibé, ohin loron liu husi tulun husi PR bele hakma’an sofrementu ne’ebé sira hasoru.
Mate
Adelino hatutan, oan ki’ak nain-7 ne’e, nia aman mate husik hela sira, iha tinan 2022.
Nune’e mós oan ki’ak, Juli Magalhaes hateten, lori nia alin na’in-6 hodi hato’o obrigadu no agradese ba PR-Horta tanba, hari’i ona uma ba sira hodi fó mahon no bele apoiu sira hodi hakma’an sira ninia sofrementu.
Ajuda
“Ha’u hato’o obrigadu no agradese ba PR tanba bele ajuda ona ami na’in-7 ho ami nia inan. Ami mós husu nafatin ba PR atu ajuda mós ba ami maluk oan ki’ik sira seluk,”hateten Julio.
Uma ho medida 7×9, kuarta-2, kompleta ho armari ropa nian, kama toba, sala-1, meza kadeira no Televisaun inklui Kios. Total osamentu ba kontrusaun uma ho mobiliares, Kios inklui dapur no hari’is fatin ho valor osan $ 13 Mill ital. Entretantu, DSSAS iha Palásiu Prezidénsial, apaoiu hari’i ona uma ba família kbi’it la’ek hamutuk-20. Progrma-1 ne’e, hahú husi 2023, bazeia proposta, hafoin PR halo despaixu ho karakter urjensia.(lx)
