DiliPost.com-Konklave ba hili Papa foun sei hala’o iha loron 07 Maiu tinan 2025 no Vatikanu fó sai katak sinál telekomunikasaun movel iha territóriu Estadu Sidade Vatikanu sei dezliga totál.
Dezligasaun ba sinál telemovel hahú husi tuku 15h00 oras lokál Vatikanu nian [tuku 22h00 otl] iha loron 07 Maiu, eskluindu iha área Kastél Gandolfu.
“Sinál ne’e sei restabelese depois anúnsiu haktuir eleisaun Sumu Pontífise”, informasaun husi Vatikanu.
Serbisu ba preparasaun Kapela Sistina no akomodasaun iha uma rua Casa Santa Marta pratikamente konklui ona, no Kardeál sira bele halo check-in hahú iha loron tersa-feira oras dadeer.
Aleinde ne’e Kardeál sira bele dezloka husi Casa Santa Marta to’o Kapela Sistina konforme sira nia hakarak, inklui la’o ain deit, más ho perkursu protejidu.
Hela loron 2 hahú Konklave, Kardeál sira reúne iha segunda-feira ne’e halo Kongresaun Jerál 2, ida iha dadersán no seluk iha lokraik. Kardeál eleitór hamutuk 133 daudaun iha hotu ona Roma.
Enkuantu Iha enkontru 2 ne’e aborda tema oioin hanesan migrasaun, funu, sinodalidade, ekleziolojia komuñaun, seita no kompromisu no responsabilidade Kardeál sira-nian atu apoia Papa foun, papél feto, Karitas, diteitu kanóniku no papél Estadu Sidade Vatikanu nian.
Iha lokraik ne’e, iha Kapela Paulina, realiza mós serimónia juramentu pose ba funsionáriu no asistente Konklave tantu ekleziástiku kuantu leigu besik atus.
Lembra katak kadeira líder Igreja Katólika daudaun ne’e mamuk depoizde Papa Francisco hakotu iis iha loron 21 Abríl 2025. Mate-isin Papa nian haloot ona iha Bazílika Santa Maria Maiór iha Roma, iha loron 26 Abríl 2025.
Entretantu Tuir tradisaun, Vatikanu halo períodu lutu durante loron sia depoizde Papa mate. Liu ida ne’e, realiza prosesu Konklave hodi hili Papa foun neʼebé hala’o ho prosesu ne’ebé segredu tebes.
Notisia Foti husi Vatican News.
Jornalista Júlia Lurdes do Rêgo.
