Dilipost.com, 01 Janeiro 2026– Iha biban kmanek selebrasaun Natal no hametin an atu simu Tinan Foun 2026, Diretor Jornál DILI POST, Fernando da Silva, hato’o mensajen gratidaun no esperansa ba públiku tomak.
Reprezenta kbiit-na’in no staf hotu husi DILI POST, Fernando da Silva fó agradesementu boot ba parseiru sira, lee-na’in, no mós ba komunidade ne’ebé durante ne’e hamutuk ona ho sira hodi habelar informasaun iha rai laran.
Esperansa ba Dame no Prosperidade
Iha ninia mensajen, Diretor Fernando la haluha hato’o votos ba loron bo’ot Natal nian ne’ebé nakonu ho domin. Nia mós hato’o ninia deseju
ba Tinan Foun 2026 ne’ebé besik ona mai.
”Ami hato’o Feliz Natal no Tinan Foun di’ak ba komunidade tomak. Ami-nia esperansa mak tinan foun ne’e bele lori dame, unidade, no mós di’ak ba ema hotu-hotu iha ita-nia rain,” dehan Fernando da Silva liuhusi komunikadu ida.
Hametin Serbisu Hamutuk
Alende hato’o votos, selebrasaun ne’e mós sai hanesan tempu ida atu DILI POST hametin liután kompromisu hodi serbí nafatin komunidade liuhusi informasaun ne’ebé kualidade no edukativu.
Diretor ne’e taka ninia mensajen hodi husu ba komunidade hotu atu selebra loron festa sira ne’e ho fuan ne’ebé haksolok no hakmatek, hodi simu 2026 ho laran-metin.
