Dílipost.com, 20Agostu 2026 – Ministru Negósiu Estranjeiru no Kooperasaun Portugal, Paulo Rangel, hato’o apresiasaun bá preparasaun Timor-Leste (TL) atu hala’o Reuniaun Ministeriál no Reuniaun Konsellu Ministrus Komunidade Nasaun sira Ko’alia Lian Portugés (CPLP).
Apresiasaun ne’e hato’o hosi Paulo Rangel durante enkontru kortézia ho Primeiru-Ministru (PM), Kay Rala Xanana Gusmão, iha Palásiu Governu, Dili, kuarta (19/08).
Paulo Rangel agradese bá PM Xanana Gusmão no Governu Timor-Leste bá simu delegasaun Portugal no preparasaun ne’ebé hala’o hodi garante susesu reuniaun CPLP, ne’ebé mós hala’o iha ámbitu selebrasaun aniversáriu ba dala-30 CPLP.
“Parabéns bá ita-bo’ot sira kona-bá organizasaun perfeita reuniaun ministeriál ida-ne’e nian, ho rezultadu interesante tebes. Buat hotu prepara ho di’ak tebes hosi Timor-Leste,” Paulo Rangel hateten.
Ministru Negósiu Estranjeiru Portugal mós hato’o agradesimentu hosi povu Portugés tomak bá Timor-Leste, liuliu kona-bá apoiu ne’ebé Timor-Leste fó bá kandidatura Portugal atu sai membru Naun-Permanente iha Konsellu Seguransa Nasoins Unidas.
Enkontru kortezia ne’e mós aborda asuntu sira relasiona ho CPLP, liuliu kooperasaun iha área lian Portugés no relasaun bilateral entre Timor-Leste no Portugal.
PM Xanana Gusmão hateten enkontru ne’e nu’udár enkontru kortézia, ne’ebé fó oportunidade bá parte rua atu ko’alia informalmente kona-bá CPLP no kooperasaun entre Timor-Leste no, Portugal.
“Ministru Negósiu Estranjeiru no Kooperasaun Portugal, Paulo Rangel, nia mai bá dala-rua ona. Antes iha 2024, agora mai partisipa iha Reuniaun Konsellu Ministrus CPLP. Ami hasoru malu ko’alia oitoan kona-bá CPLP rasik, kooperasaun Portugal ho Timor. Ne’e duni ami ko’alia liu de’it tanba ne’e nu’udár reuniaun kortézia,” PM Xanana hateten.
Iha enkontru ne’e, PM Xanana Gusmão akompaña hosi Vise-Ministra Negósiu Estranjeiru no Kooperasaun, Jesuína Maria Ferreira Gomes, Embaixadór Portugal iha Timor-Leste, Duarte Bué Alves no Xefe Gabinete Primeiru-Ministru, Elizabeth Exposto.
Jornalista : Azacsi Quintão
