DiliPost.com – Primeiru interogatoriu Kuarta feira (29/07) ne’e iha Tribunál Judisial Primeira Instansia Dili, Ministeriu Publiku husu Tribunbal aplika Prizaun Preventiva ba arguidu nain 7 ne’ebe ‘kaer’ kompleta mos ho evidensia iha area Seisal Munisipiu Baucau.
Sidadaun estranjeiru hirak ne’e hetan kapturasaun husi autoridade seguransa tasi iha Timor Leste tanba identifika hatama sigaru ilegal ho kuantidade karton 2,583.
Iha prosesu primeiru interogatoriu tribunal deside aplika medida Koasaun Aprezentasaun Periodika (AP), medida Proibisaun Auzensia (PA) ba arguidu nain 6 no nain 1 hetan Medida koasaun Termu Identidade Rezidensia (TIR) tanba fora hosi flagrante delitu, ba kazu deskonfia Ro Ilegal tula sigaru hamutuk karton 2,583 iha Baukau.
Aliende ne’e Tribunál halo tiha identifikasaun ba arguidu nain7 no deside kontinua tama ba alegasaun Ministériu Públiku no Defeza nia, tanba arguidu sira hili direitu nonok.
Nune’e iha alegasaun Ministériu Públiku nia, husu Tribunál atu aplika medida koasaun Prizaun Preventiva ba arguidu nain-hitu, tanba arguidu sira deskonfia uza Ro Ilegál hodi halo operasaun iha nasaun Timor-Leste.
No parte defeza ba arguidu nain-hitu, Advogadu privadu husu Tribunál aplika medida koasaun Aprezentasaun Periodika no Proibisaun Auzensia ba arguidu nain-6 no arguidu nain-ida ho inisial CC husu Tribunál aplika medida koasaun Termu Identidade Rezidensia, tanba ninia detensaun ne’e ilegal tanba fora de Fraglante Delitu.
Nomos despaixu Tribunál nian, aplika medida koasaun AP, medida PA ba arguidu nain 6, no arguidu nain 1 aplika medida koasaun TIR tanba detein nia fora de Fraglante Delitu, ker dizer detensaun ilegál, sein mandadu detensaun nune’e aplika de’it medida TIR ba nia.
Nune’e mos ba Sasan sira ne’e (evidénsia) nia prosesu sei la’o no sei remete ba Tribunál Distrital Baukau tan ne’e kompeténsia kabe ba Tribunál Distrital Baukau tanba área juridisaun ida ne’ebá nia.
Iha Prosesu primeiru Interogatoriu ne’e, prezide hosi Juiz turnu, José Quintão, Ministériu Públiku reprezenta Prokurador, Matias Soares no arguidu nain 7 hetan asistensia legal hosi Advogadu Privadu, Napoleão de Oliveira Carvalho.
Jornalista : Octaviana Costa
