DiliPost. com-Xefi estadu Jose Ramos-Horta ho Delegasaun to’o iha Aeroportu Internasionál Kuala Lumpur, iha
Kuala Lumpur, loron 17 juñu 2025 tuku 16:30 loraik, Simu direta husi Embaxadór Timor-Leste ba Malaysia Lisualdo, hafoin ho delegasaun sira diretamente ba Hotél St. Regis Kuala Lumpur.
Tuir ajenda, Prezidente Republika Ramos-Horta sei partisipa iha forum ‘Global Leadership & Dialogue Initiative’ (GLDI), Kuala Lumpur Malázia.
Partisipasaun Prezidente Ramos-Horta nian iha fórum ne’e representa nia kontinuasaun halo promosaun ba paz, justisa sosiál no etika lideransa iha nivel mundiál. Prezidente Ramos-Horta sei fó mos diskursu prinsipál (keynote speech), ne’ebé provavel aborda esperiénsia hosi Timor-Leste nian no perspetiva ba lideransa humanista no dialogu konstrutivu.
Hafoin Prezidente Ramos-Horta sei halo mos Jantar Konfraternizasaun importante hó primeiru Ministru Malaysia Dato Seri Anwar Ibrahim, hodi aprofunda relasaun bilaterál sira ho Malázia, parseiru xave ASEAN no apoiante ba tempu naruk Timor-Leste nian.
Iha loron 19 Prezidente José Ramos-Horta sei simu Títulu Doutór Honoris Causa husi Universidade Taylor’s, Malázia hanesan forma rekoñesimenru ba nia kontribuisaun bo’ot iha área diplomásia internasionál, direitus umanus no dezenvolvimentu nasionál.
Konvite ida ne’e fo husi Universidade Taylor’s hanesan parte importante ba serimónia akademika espesiál, ne’ebé fó prestíjiu ba lideransa Ramos-Horta iha rai laran no iha mundu. Prezidente Ramos-Horta, hanesan mos Laureadu nobél ba Paz nia simu Titulu ne’e nu’udar Méritu extraordináriu iha luta ba direitus umanus, paz no justisa globál.
Remata iha Malázia Xefe Estadu ho Delegasaun sei kontinua kedas halo viajen bá Mónaku, iha ne’ebé vizita ofisiál ida-ne’e marka ona ba loron 23 to’o 25 Juñu.
Prezidente Ramos-Horta sei halo enkontru ofisiál ho autoridade Monégasku sira no partisipa iha kompromisu diplomátiku sira ho nível aas. Pontu importante mak sesaun interativu ho estudante internasionál liu 40, promove diálogu kona-ba asuntu globál no fahe esperiénsia dezenvolvimentu úniku Timor-Leste nian.
Programa ne’e inklui almosu ho nivel aas ho distintu konvidadu na’in 20 no partisipa iha atividade sira husi Fundasaun Prínsepe Alberto II ne’ebé foka ba sustentabilidade ambientál no asaun klimátika.
Vizita sira ne’e mós subliña Prezidente Ramos-Horta nia esforsu kontinua atu diversifika parseria internasionál Timor-Leste nian no asesu oportunidade foun iha edukasaun, kuidadu saúde, no dezenvolvimentu sustentável.
Prezidente Ramos-Horta tuir planu sei fila hikas mai Timor-Leste iha loron 27 fulan-juñu tinan 2025.
Jornalista: Azacsi Quintão
