DILI Post —Repúblika Demokrátika Timor-Leste (RDTL) no Demokrátika Populár (RDP) Laos,Selebra Akordu Koperasaun Bilateral iha Setor Importante Rua ba Timor-Leste Nia Dezenvolvimentu Iha Futuru.
Nota Entendimentu Ne’ebe Sai Sasin husi Primeiru-Ministru (PM), Kay Rala Xanana Gusmão ho ninia omólogu Primeiru-Ministru Repúblika Demokrátika Populár (RDP) Laos, Sonexay Siphandone, atu estabelese kooperasaun bilaterál iha área rua mak hanesan troka direitu sira atu utiliza rai no edifísiu misaun diplomátika, no izensaun vistu bá titulár pasaporte servisu ho diplomátiku.
Dokumentu kooperasaun ne’e asina hosi Ministru Negósiu Estranjeiru no Kooperasaun, Bendito dos Santos Freitas, no RDP Laos asina hosi Vise-Primeiru-Ministru no Ministru Negósiu Estranjeiru, Saleumxay Kommasith, iha Sentru Konvensaun Nasionál RDP Laos, iha Loron 08 Fulan Outubru 2024 foin lalais ne’e.
“Asinatura akordu rua ne’e refleta ita-nia kompromisu mútua atu hametin liu-tán relasaun bilaterál entre Timor-Leste ho RDP Laos iha tinan sira tuir-mai,” PM Xanana hateten durante enkontru bilaterál.
Xefe Governu konsidera TL ho RDP Laos iha relasaun amizade, tanba ne’e fiar katak sei iha oportunidade atu hametin liu tán relasaun hodi esplora área potensiál sira atu hasa’e kooperasaun.
Xanana Gusmão mós espresa sentimentu kontente no felisita RDP Laos ne’ebé assume Prezidénsia ASEAN nian ne’ebé susesu, hodi kontinua dezeja susesu iha Simeira ASEAN bá 44 no 45 ne’ebé sei realiza iha 09 Outubru 2024.
Xanana Gusmão dehan, Laos sai uma-na’in bá ASEAN durante situasaun ne’ebé difísil tebes iha tempu ida ne’ebé mundu enfrenta konflitu no krize oioin.
Xefe Ezekutivu TL ne’e haksolok tanba ASEAN bele hala’o papél hanesan estabilizadór iha asuntu globál sira, hodi promove toleránsia no pás.
TL mós aproveita hato’o apresiasaun no agradese bá RDP Laos tanba fó ona apoiu no tinan oin bele sai membru plenu ASEAN nian.
Iha enkontru bilaterál ne’e, Primeiru-Ministru akompaña hosi Vise Primeiru-Ministru, Ministru Asuntu Ekonómiku no Ministru Turizmu no Ambiente, Francisco Kalbuadi Lay, Vise Ministra Asuntu ASEAN, Milena Maria da Costa Rangel, Embaixadór Timor-Leste iha Laos, Filomeno Aleixo da Cruz, Xefe Gabinete Primeiru-Ministru nian, Elizabeth Exposto no Diretora Jerál ASEAN, Elisa da Silva.
Jornalista:Javelino Da Silva
