Dilipost com – Prezidente Repúblika (PR) José Ramos-Horta hateten katak to’o agora seidauk simu informasaun ruma husi Primeiru-Ministru (PM) Kay Rala Xanana Gusmão kona-ba halo remodelasaun iha governu.
“Ida ne’e issu lalo’os, durante tinan tolu (3) ha’u nia Prezidénsia, PM seidauk ko’alia ho ha’u kona-ba remodelasaun ruma. Ha’u mos la ko’alia ba PM atu halo remodelasaun, tanba ida ne’e kompeténsia 100% Primeiru-Ministru nian,” hateten PR Ramos-Horta ba jornalista sira iha Palásiu Prezidensiál, Tersa-Feira (16/12/2025).
PR dehan PM iha liberdade tomak atu halo desizaun ne’e, no Prezidente la mete iha asuntu remodelasaun. Nia hatene katak iha pratika polítika internasionál, remodelasaun governu mak bu’at normal.
Maibé, PR Hare katak governu agora to’o ona tinan tolu husi mandatu, no hela de’it tinan rua. PR katak, tinan rua ne’e lolo’os konsidera hanesan tinan ida ho balun de’it, tanba iha fulan ne’en ikus antes eleisaun, governu la bele halo bu’at ida.
“Se remodelasaun halo iha 2026, ne’e tarde ona,” dehan PR.
PR mos hateten katak to’o agora PM seidauk hatudu hanoin atu halo remodelasaun, tanba depois governu kompleta tinan tolu, PM mos la ko’alia ho Prezidente kona-ba asuntu ne’e.
“Ne’e mak informasaun ne’ebé ha’u bele hateten ba ita boot sira,” remata PR Ramos-Horta.
Jornalista : Dili Post.
