DILI Post – Governu Konstitusional da-Sia liu husi Sekretaria Estadu Komunikasaun Sosiál (SEKomS) apresia no louva media estatal, privadu inklui imprime no plataforma dizital sira hotu ne’ebé halo kobertura durante vizita Sua Santidade Papa Francisco iha Timor-Leste hahú husi loron 09 to’o 11 Setembru 2024.
Rádio no Televizaun Timor-Leste, Empreza Públika (RTTL, E.P.) ho Grupu Media Nasionál (GMN) halo transmisaun direta ho kapas tebes, plataforma media dizital, nasionál no internasionál, arkivu no produtór audiovizual sira foti output ho di’ak maske sei iha difikuldade oioin.
Iha oportunidade, SEKomS Expedito Loro Dias Ximenes mos apresia no louva parseiru sira hotu liuliu TIC-Timor, I.P., DNIK-Ministériu Transporte Komunikasaun (MTK), Timor Telecom, Telkomcel, Telemor no internet provaider sira hotu.
“Governu agradese ba ita nia servisu hamutuk ne’ebé extraordinária. Ita boot sira nia ekipa redasaun liuliu Jornalista no Tékniku sira nia dedikasaun no esforsu hotu ba kobertura iha ámbitu Vizita de Estadu i Apostólika Sua Santidade Papa Francisco iha Timor-Leste folin boot tebes,” Sekretáriu Estadu Komunikasaun Sosiál, Expedito Loro Dias Ximenes Hato’o Apresiasaun ne’e liu husi Nota Informativa ne’ebe Dilipost.com Assesu Segunda ne’e. (16/9).
Sekretáriu Estado Komunikasaun Sosiál, espera katak kolaborasaun no parseria ida ne’e, bele kontinua nafatin, ba atividades seluk Governu da-Sia nian iha futuru.
“Sussesu ida ne’e ita hotu nian. Sussesu tanba hotu-hotu tau aas interese públiku nian ba informasaun no arkiva memória vizita Papa Francisco iha Timor-Leste,” SEKomS subliña.
Enkuantu Media Sira ne’ebe Durante Kobertura Vizita Papa Francisco Iha Timor-Leste kompostu husi Media Electronic Media Imprimi no Media Online sira ne’ebe Ejiste iha Timor-Leste.
Jornalista:Javelino Da Silva
