DILI Post – Atu komemora loron 30 Agostu konsulta Popular ba dala 25. Prezidente Republika (PR) José Ramos-Horta haruka ona konvite espesiál konvida Sekretáriu Jerál (SekJer) Nasoins Unidas (ONU) António Guterres atu partisipa.
Karta ne’e Ministru Negosiu Estranjeiru Bendito Freitas ne’ebe akompaña Primeiru Ministru Kayrala Xanana Gusmão ofisialmente entrega direita konvite espesiál husi PR ba SekJer ONU.
Tuir Komunikanu ne’ebe Dili Post asesu, Sabadu (1/06), mensiona katak konvite ho karater espesiál ne’ebé prepara husi Xefe Estadu Ramos-Horta no povu Timor-Leste nian ne’e, entrega ofisiálmente husi Xefe Governu Xanana Gusmão bá SekJEr ONU, António Guterres, bainhira partisipa abertura IV konferénsia internasionál kona-bá Estadu Illa Ki’ik Dezenvolvidu (SIDS) sira ho tema “Hamutuk Trasa Planu bá Prosperidade Reziliente,” iha São João, Antígua no Barbud, foin lalais ne’e.
“Konvite ne’e espesiál tebes bá Sekretáriu Jerál ONU, António Guterres hosi povu Timor-Leste,” haktuir Primeiru-Ministru Xanana Gusmão.
Aliende Konvite espesiál ne’e mós sei hato’o bá bainaka importante sira seluk hanesan Xefe Estadu no Xefe Governu nasaun balun, ne’ebé sei konvida atu partisipa iha festa komemorasaun konsulta populár husi loron 20 to’o loron 30 fulan-Agostu 2024, hodi fó lembra kona-bá istória luta Timor-Leste nian bá independénsia.
Iha fatin hanesan, Sekretáriu Jerál ONU, António Guterres sente onradu bele hasoru Kay Rala Xanana Gusmão hanesan lider rezisténsia Timor-Leste nian ho povu Timor-Leste ne’ebé sai nu’udár belun di’ak bá líder ONU ne’e.
“Benvindu grandee amigu, Kay Rala Xanana Gusmão. Orgullu tebes bele hasoru-malu ho ita iha fatin ida ne’e. Agradese bá ita-nia prezensa iha enkontru ida-ne’e,” tenik SekJer ONU ne’e bainhira simu karta husi Xanana Gusmão no kaer-liman, hako’ak-malu nu’udár belun di’ak.
Nia mos agradese ba konvite. Maibé, líder ONU ne’e seidauk bele fó resposta kona-bá ninia partisipasaun, tanba sei haree bá servisu ONU nian ne’ebé daudaun ne’e foka bá pás no dame iha nasaun hotu-hotu.
Tuir nia durante ne’e iha relasaun di’ak ho povu no lider sira Timor-Leste nian to’o assume kargu nu’udár SekJer ONU, kontinua hakle’an kooperasaun ho Timor-Leste, estabelese parseiru oin-oin ho nasaun membru hirak ne’ebé halo parte iha sistema globál ONU hodi ajuda hadi’a no dezenvolve Timor-Leste iha setór oioin.
Entertantu António Guterres assume kargu Primeiru-Ministru Portugál hosi tinan 1995 to’o tinan 2022, no hala’o knaar hanesan Altu Komisáriu ONU nian bá Refujiadu sira hosi tinan 2005 to’o tinan 2015.
Husi loron 1 fulan-Janeiru tinan 2017 simu knaar hanesan Sekretáriu-Jerál ONU. Eleitu hikas ho lian ida de’it hosi Estadu-Membru ONU nian hamutuk 193, bá mandatu foun iha loron 1 fulan-Janeiru 2022 to’o agora.
Jornalista:Javelino silva
