DILI Post-Polísia Nasionál Timor-Leste (PNTL), Departamentu Investigasaun Kriminál Nasionál (DIKN), se’i halo Operasaun identifika ‘Bengkel’ ne’ebé durante ne’e, modifika motor na’ok hodi submete ba prosesu.
Ho ida ne’e, parte Polísia Investigasaun Kriminal (PIK), nafatin hala’o Operasaun buka tu’ir grupu no individu hirak ne’ebé durante ne’e, na’ok motor ho Telefone no sasán iha teritoriu Timor-Leste (TL).
Ho hahalok ema ne’ebe la iha responsabilidade durante ne’e, ema barak sofre ba nia motor lakon. No balun sente paniku ‘Resah.’ Afinal iha ‘Bengkel’ balun ‘Kong X Kong’ ho ema na’ok ten sira hodi foti ema nia motor ba modifika iha ‘Bengkel.’ Ida ne’e, tenke ta’u atensaun seriu. Se la’e ema barak tutur liman ho sasan lakon.
“Ita nia Servisu Informasaun deteta, depois aprezenta mai parte DIKN rasik halo Operasaun hamutuk ho ita nia parseiru sira atu halo atuasaun ba Krimi ne’ebé akontese iha dalan Estrada publiku. Ita bele hapara ou hamenus,”informa Komandante-DIKN Superintendente Polisia João Belo dos Reis ba Jornalista liu husi Konferensia Inprensa (KI), iha Kuartel Jerál-PNTL, Caicoli-Dili, Tersa-feira (11/06).
Modifika
João hatutan, kazu na’ok motor ne’ebé akontese iha TL, Polísia se’i halo Operasaun hodi identifika ‘Bengkel’ hirak ne’ebé durante ne’e, modifika motor hodi submete ba prosesu.
Kazu na’ok ne’ebé durante ne’e, akontese, Polísia alerta ba inan-aman sira atu Eduka oan sira. Tanba, oan sira la’o livre la tama uma, sira ka’er Telefone no ka’er motor sira depois inan-aman la hase sasan hirak ne’e, mai husi ne’ebé.
Aktus Krimi sira atu reduz, kontribuisaun husi inan-aman nian hola parte Edukasaun importante. Kuandu inan-aman rasik la Eduka. Husik nafatin la iha informasaun ba Polisia.
Ida ne’e, oan sira kontribui ona ba Krimi ne’ebé akontese no kontribui ba situasaun ne’ebé ak la hakmatek ba inan-aman sira iha Bairru laran.
Individual
Kazu hirak ne’e, akontese maioria asaun individual, maibé balun,”ita identifika asaun organizadu ita se’i buka tu’ir ‘Bengkel’ hirak ne’ebé modifika motor na’ok sira no Loja ne’ebé hadi’ak Telefone na’ok.
Depois, ita se’i buka tu’ir responsabiliza sira nia aktus ne’ebé sira halo, tanba ida ne’e, kontribui hotu ba situasaun Krimi iha dalan publiku,”informa João.
Xavi
Aleinde ne’e, Polísia mós se’i buka tu’ir ema ne’ebe produz xavi motor hodi fasilita malun na’ok motor iha Dili laran no iha Munisípiu sira. Bainhira, identifika hetan sira se’i responsavel ba aktus ne’ebé sira envolve.
Ida ne’e, se’i lansa Operasaun buka tu’ir hotu atu identifika ema hirak ne’ebé envolve produz xavi motor,”ita se’i prosesu tu’ir Lei ne’ebé vigóra iha TL,”subliña João.(ercia)
