DILI Post-Primeiru-Ministru (PM), Kay Rala Xanana Gusmão fó orientasaun bá Ministru Justisa (MJ), Sérgio de Jesus Fernandes da Costa Hornai, Ministru Interiór (MI), Francisco da Costa Guterres ho Diretór Servisu Nasionál Intelijénsia (SNI), Longuinhos Monteiro hodi hametin liu-tán liña koordenasaun iha luta kombate krime rai laran.
“Primeiru-Ministru fó orientasaun mai ha’u hanesan Ministru Justisa, Ministru Interiór, no mós bá Servisu Intelejénsia atu iha koordenasaun ida metin liu, hodi bele haree situasaun sira ne’ebé la’o iha ita-nia rai laran liu-liu seitór justisa, seguransa no mós iha servisu informasaun intelejénsia.” imforma MJ Sérgio de Jesus Fernandes da Costa Hornai ba Jornalista sira hafoin enkontru Primeiru-Ministru iha Palásiu Governu, sesta (21/06/2024).
Governante ne’e Argumenta, Orientasaun ne’e atu ita bele iha informasaun ida loos kona-bá saida mak ita hakarak kuandu iha modus krime ruma.
Alende ne’e, parte sira mós atualiza bá Xefe Governu kona-bá informasaun sira relativamente ho situasaun en-jerál liu-liu iha área justisa, seguransa no mós servisu intelejénsia nian.
Primeiru-Ministru konfirma mós kona-bá buat balun bá servisu sira ne’ebé parte sira ne’e halo atu bele kontinua ba oin, liga ho polítika justisa rai-laran, situasaun prizioneiru sira, servisu investigasaun sira ne’ebé Ministériu ne’e halo, iha konsellu jerál kona-bá investigadór sira, liga mós ho reuniaun regulár sira ne’ebé atu halo oinsá bele konsolida kona-bá servisu investigasaun kriminál iha rai-laran inklui desizaun sira atu proteje sidadaun sira iha prizaun.
Jornalista: Javelino Da Silva
