DiliPost.com – Sabadu (20/01) ohin, Ministru Justisa, Amândio de Sá Benevídes, hakotu is bainhira hein xefi Governu fila husi Rai liur iha Aeroporto monu derepente tanba hetan atakasaun fuan.
Ho akontesementu ne’e Primeiru-Ministru (PM), Kay Rala Xanana Gusmão sente triste no lakon ema pontensiál ida iha IX Governu Konstitisionál tanba maktoban halo duni servisu todan boot ida hamutuk ho ekipa tékniku sira hodi konsege rezolve problema kaderneta pasaporte Timor-Leste nian iha fulan hirak nia laran, la’ós servisu fásil.
“Triste tebes tanba ha’u asiste, bainhira tun hosi aviaun ha’u sei konversa hela ho sira hotu, ha’u ko’alia mós ho Ministru Amândio. Ha’u husu sira hotu nia kondisaun. Ami na’in-rua sei hamnasa hela, kaer liman, ami la’o hamutuk tama sala VIP, derrepenti hetan atakasaun. Ami hotu preokupadu,”haktuir PM Xanana ho sentimentu triste bainhira akompaña direta matebian iha Hospitál Nasionál Guido Valadares (HNGV).
Xefe Governu ne’e espresaun nia Profunda sentimentu triste ne’e nu’udár PM ho nia kuadru importante ida iha postura Governu ne’e, hanesan mós despedida ikus nian.
Aleinde ne’e Molok Ministru Justisa husik-iis, iha dadeer maktoban hamutuk ho membru Governu sira seluk hein iha Aeroportu Internasionál Prezidente Nicolau Lobato, hodi simu Xefe Governu ne’ebé foin fila hosi Davos, Suiça.
Bainhira Xefe Governu tun hosi aviaun, Ministru Amândio hamutuk ho membru Governu sira akompaña direta bá iha sala VIP.
Membru Governu no seguransa sira konsege fó asisténsia hodi hatuur-hikas no hatoba iha sofa leten, nune’e Xefe Governu orienta Vise-Ministru bá Operasionálizaun Ospitál, Dr. Flavio Brandão Mendes de Araújo kontaktu ambulánsia no konsege transporta kedan bá HNGV hodi hetan asisténsia médika.
Iha oras hanesan, Primeiru-Ministru despede Prezidente Repúblika, José Ramos-Horta ne’ebé hala’o viazen Estadu bá Vaticano-Roma no kontinua tuir kedan Ministru Amândio bá HNGV maibé médiku sira la konsege salva.
Tuir kronolojia katak, iha dadeer Ministru bá simu PM Kay Rala Xanana Gusmão iha Aeroportu internasional Nicolao Lobato ne’ebé foin mak fila hosi Suiça, no Ministru hetan kedan atakasaun fuan, ekipa médiku konsege transporta ba HNGV maibé la konsege salva.
Nune’e Xanana Gusmão hanesan Xefe Governu hato’o Profunda Kondolénsia bá Família. (Donny)
