DILI Post-IX Governu Konstitusionál liu-hosi Primeiru-Ministru (PM), Kay Rala Xanana Gusmão hamutuk ho Ierarkia Igreja Katólika Timor-Leste hato’o parabéns bá povu tomak ne’ebé hadomi pás no kontribui ambiente hakmatek durante loron tolu hodi fó susesu bá vizita Sua Santidade Papa Francisco.
Situasaun ne’e sai hanesan orgullu bo’ot bá Estadu no Igreja Katólita Timor-Leste, tanba povu liu-liu joven sira hatudu pás no domin boot bá ulun bo’ot Kreda nian iha Timor-Leste.
“Sira mai hasoru-malu ho Governu, la’ós atu agradese malu maibé hamutuk felisita tanba ho servisu hamutuk entre mak sai susesu bo’ot ida. Ita atu felisita karik felisita povu ne’ebé ho laran tomak to’o iha Dili desde tersa kalan tomak aguenta iha Tasi-Tolu. Ha’u felisita liu mak joven sira tanba sira-nia komportamentu di’ak tebtebes, hatudu katak timoroan sira bele kria nafatin armonia, laiha violénsia, hatudu domin hodi fraternidade umana bele sai realidade iha ita-nia rain,” PM Xanana hateten hafoin enkontru ho Bispu dioseze tolu akompaña mós hosi Reprezentante Santa-Se iha Timor Leste, Marco Sprizzi, iha Palásiu Governu, kuarta (11/09/2024).
Iha fatin hanesan, Arsebispu Arkedioseze Dili, Dom Virgílio Kardeál do Carmo da Silva, SDB akresenta, hasoru-malu ho parte Governu hakarak fahe ksolok bá malu tanba durante ne’e kolabora hamutuk hodi fó susesu bá eventu boot ne’e.
“Ksolok ne’ebé ita hetan loron hirak ne’e tanba povu no joven ninia maturidade. Ema hotu-hotu hosi ki’ik to’o bo’ot, buat furak ne’e mundu haree tanba ema esforsu hotu-hotu nian. Tanba ne’e Governu ho Igreja hakarak felisita sarani Timor tomak. Hanesan Amu Papa dehan, igreja mak povu, nasaun mak povu ne’ebé tane a’as povu,” Dom Virgílio dehan.
Ho maturidade, servisu hamutuk, terus hamutuk iha loron manas nia laran durante loron tolu, ulun bo’ot kreda Timor ne’e konsidera hanesan aktu ida kompaisaun sarani Katólika Timor iha ninia unidade ho Ierarkia Igreja Universál.
Sua Santidade Papa Francisco vizita ona Timor-Leste durante loron tolu, hosi loron 09 to’o 11 setembru 2024. Ohin kontinua hala’o vizita Apostólika bá nasaun Singapura.
Jornalista:Javelino Da Silva
