DiliPost.com-Eskola Bazika Filial (EBF) 1,2 siklu numeru 6 Marinir Beto’o enfrenta problema menus fasilidades hanesan sala aula ho kondisaun la di’ak ona no fasilidades balun hodi prepara Merenda Eskolar (ME), ba Estudante sira. Informa kozineira Fidelio Lemos iha kna’ar fatin Beto’o, Kinta feira ne’e.
Dapur
Fidelio konta katak, iha Eskola ne’ebe refere tein di’ak, Estudante sira han ho di’ak, maibé problema uitoan Sala Aula 4 ninia plafon kuak hotu ona. Sasán dapur hanesan taxu, kanuru-bikan menus.
“Ami presiza tan sana 2, taxu, kanuru-bikan tan, ho númeru Estudante kuaze 4.90. Ho ida ne’e, kanuru-bikan la to’o. Baibain ami fahe tu’ir klase de’it, klase ida han hotu hafoin fase fila-fali bikan hirak ne’e, sira seluk bele uza hikas. Aleinde ne’e, bainhira udan, sempre tama, tanba kondisaun plafon la di’ak,”katak Fidelio.
Moru
Enkuantu, Koordenador Eskola Justino Madeira Babo klarifika, fasilidades hanesan meza no kadeira sufisiente hela. Soke númeru Estudante menus kompara ho tinan hirak ba kotuk.
Maibé, Eskola nafatin husu Governu atu kria moru protesaun ba Eskola refere. Atu nune’e, Biblioteka no sala Professores, kondisaun kantina ou dapur hodi prepara ME ba Estudante sira mós ho kondisaun la di’ak ona.
Administrasaun
Justino hatutan, provizoriamente sira uza sala Administrasaun hanesan sala Biblioteka. Tanba, durante ne’e, Eskola refere seidauk hetan apoiu husi Governu ou doador sira.
Maski, sira hato’o ona ba parte kompetente atu resolve. Maibé, tu’ir lista Terras no Propriedades katak, Eskola ne’e, rasik mos tama ona iha rizku eviksaun. Atu nune’e, husi parte kompetente hateten, se’i hari’i edifisiu foun Eskola ne’e, nian.
Kompara
Aleinde ne’e, no konaba programa ME-EBF Marinir implementa tarde kompara ho Eskola sira seluk, foin hahú iha loron (29/04/2024) ne’e, se’i kontinua to’o fulan Novembru.
Nune’e, iha loron Segunda-feira-Tersa-feira Estadante sira konsumu etu ho bifi, Kuarta-feira Estudante sira konsumu manu-tolun no ai-fuan, Kinta-feira nafatin bifi no Sesta-feira fore-mungu no susu ben.(leya)
