DiliPost.com – Utiliza armas tiru residensia eis Prezidente Republika (PR) Fransisco Guterres ‘Lu Olo’ deskonfia grupu ne’ebe organizadu.
Akontesementu ne’e akontese, Kuarta feira (1/1/2025) kalan tinan tuan ho tinan foun truka malu, iha Farol-Dili.
Tuir kronolojia katak momentu akontese eis Prezidente Lu-Olo sai ba liur hodi hare publiku sira sunu figetes (petasan),nia lian ne’ebe simu tinan foun halo publiku hotu antusias hodi sunu figetes harame kapital Dili.
Maibe bainhira eis PR Lu-Olo tama fila fali ba iha uma laran,hare meximha ne’ebe baibain eis PR Lu-Olo tur hodi hemu kafe,hetan tiru no vidru ne’ebe iha meziha nia kotuk mos rahun.
Iha momentu ne’e liga kedas ba iha parte polisia investigasaun Kriminal hodi ba hare kedas,no identifika kartus musan,mai husi arma revolve antiga,no kartus musan belit hela iha mezinha Rotan eis Prezidente Lu-Olo.
Ba kazu ne’e parte Polisia liu husi Investigasaun Kriminal,sei investiga lolos ba kartus musan ne’e oinsa bele hatene motivu lolos husi tiru nee,no nia dirasaun kartus musan nee tiru husi ne’ebe.
Tuir Veteranus Alfredo Perreira informa ba Dili Post katak akontesementu ne’e hanesan krimi organizadu ida ne’ebe iha ema ou grupu balun ne’ebe hanoin at ba eis Prezidente Lu-Olo.
Tan ne’e parte Polisia iha kompetensia boot halo investigasaun klean ba kazu nee.
“Hau nia hanoin katak ema deskunesidu ne’ebe uza arma hodi tiru tama ba iha eis Prezidente Lu-Olo nia residensia,ne’ebe kona los ba iha mezinha ne’ebe baibain eis Prezidente tur hodi hemu kafe ne’e” haktuir Alfredo.
Ne’e duni, nia dehan kazu ne’e halo sira nudar veteranus sente hakfodak,tanba iha ema balun ne’ebe mak sei hanoin at ba iha eis PR ne’ebe hanesan mos Veteranus 24 Anos,ne’ebe luta hodi defende lia los to’o hetan ukun rasik an.(AL)